Meta di Sentro pa Edukashon i Konseheria Familiar:
- Fortalesé famia di manera ku nan por dil di manera kompetente ku problema i desafionan típiko di nos tempu.
- Duna un kontribushon signifikativo pa prevení kriminalidat, divorsio, embaraso hubenil, abuso doméstiko, bandonamentu di skol tempran, baimentu mal una skol i otro problemanan tantu na Ulanda komo na Islanan di Caribe ku ta parti di reino Ulandes (esta Kòrsou, Aruba, Bonaire i Islanan ariba).
- Fungi komo entidat ku ta proveé di manera konstante i strukturá informashon i guia profeshonal pa famia. Krea un infrastruktura ku ta dirigí su mes espesífikamente riba e bienestar di famia i yuda hasi famia kapas di por dil efektivamente ku problema di nos tempu. Esta hasi famianan di Islanan ku ta pertenesé na e reino Ulandes den Caribe resistente i kapas.
- Proveé òf brinda yudansa ku hende tin akseso na dje djis dor di “klik”, riba nan kòmpiuter. Pone na disposishon di famianan rekursonan i yudansa ku nan por tin akseso na dje “online”. Yudansa manera entre otro Konseheria, Coaching, Guia profeshonal pa famia etc.; esakinan tur huntu ku e posibilidat di guia personal – esta kara kara.
- Duna informashon, tene reunion òf enkuentronan altamente informativo-edukativo, duna workshop, seminario, seminario via kòmpiuter, proveé folder, bookletnan i otro rekursonan informativo manera buki edukativo pa famia.
- Realisá i kondusí investigashon sientífiko di tal manera ku tantu profeshonalnan komo gobièrnu por disponé di informashon basa riba kultura lokal i komunidat lokal. Esaki pa yuda bin ku maneho ku ta sinkronisá i satisfasé nesesidatnan di famia lokal.
- Brinda akseso, esta pone na disposishon di públiko general i famianan en general publikashonnan sientífiko. Di tal manera ku famia i instanshanan por ta informá riba e último investigashonnan i deskubrimentu riba tereno di famia.
- Establesé i mantené relashonnan ku tersera partinan, esta otro instanshanan i organisashonnan ku ta traha ku famia di tal manera ku komo tim por hasi un trabou komplementario den komunidat.
- Hasi uso di tur medionan i forma disponibel pa por yuda famia i alkansá meta di fortalesé òf ekipá famia pa dil ku situashonnan ku ta surgi awor òf den futuro.
